ரியாக்ஷன் ரவுண்ட் அப்

உச்சி வெய்யில் மண்டையை பொளந்து கட்டிக்கிட்டிருந்த நேரத்தில் பிரஸ் மீட் முடிஞ்சதும் நமக்கு அந்த விபரீதமான யோசனை ஸ்ட்ரைக்கானது. ரஜினியின் ஸ்டேட்மெண்ட்டுக்கு ரியாக்ஷன் எப்படியிருக்கும்? ஒரு ரவுண்ட் போய் பார்த்துட்டு வந்தா என்னா? சோ, ஒரு ஜாலி கற்பனை ரவுண்ட் அப்! (அப்ப நிஜமாவே போய் பார்க்கலியான்னு கேட்குறவங்களுக்கு.... என்னை ஒழிச்சுக்கட்டணும்னு முடிவே பண்ணிட்டீங்களா?!)

மொதல்ல நேரா லாயிட்ஸ் ரோடு அதிமுக ஆபிஸ். எதோ இழவு வூட்டுக்கு வந்த மாதிரி கப்சிப். ரஜினி அறிக்கை பத்தி என்ன நினைக்கிறீங்கன்னு கேட்டதும் மிரண்டு போய் ஓடப் பார்த்தாங்க. அவங்க தர்மசங்கடத்தை புரிஞ்சுகிட்டு நேரா வண்டியை போயஸ் கார்டன் ஜெயா டிவி ஆபிஸ் பக்கம் விட்டோம். மதுரை தாக்குதல் சம்பவத்தில் உடனடியாக நடவடிக்கை எடுத்த காவல்துறைக்கும் தமிழக அரசுக்கும் ரஜினி தெரிவித்த நன்றியை மட்டும் எடிட் செய்து கொண்டிருந்தார்கள். என்னது...மத்த விஷயத்தையெல்லாம் வுட்டுட்டு ரஜினி சர்ட்டிபிகேட் கொடுத்ததை மட்டும் எடுத்துட்டிருக்கிங்களே.. அம்மாவுக்கு தெரிஞ்சா ருத்ரதாண்டவம் ஆடமாட்டாங்களான்னு எடுத்து வுட்டதும் கலவரமாகிப் போனவங்களை கண்டுக்காம நேரா அறிவாலாயம்!

உள்ளே நுழையும்போதே எதிர்பார்த்த மேட்டருதானேன்னு கரைவேஷ்டிங்க பேசிட்டிருந்தபோதே ரீயாக்ஷன் தெரிஞ்சு போச்சு. நடுராத்திரியில் போலீஸ் கதவை உடைச்சு அவசர அவசரமா கலைஞரை அழைச்சுட்டு போனதுக்கே அவ்வளவா ரீயாக்ஷன் காட்டாத ஆளுங்களாச்சே! அறிவாலயத்தை தாண்டி அப்படியே சன் டிவி ஸ்டுடியோவில் நுழைஞ்சா....முதல்நாள் சேலத்து மீட்டிங்கில் நதிநீர் இணைப்பு பத்தி பேசினதை காலைல எட்டு மணி நியூஸில் கவர் பண்ணாம போயிட்டோமேன்னு நொந்து நுடூல்ஸாய் நின்னுட்டிருந்தவங்களை ஒருத்தர் தேற்றிக் கொண்டிருந்தார். பரவாயில்லை.. இப்ப ஒண்ணும் கெட்டுப் போயிடலை. நதிநீர் பத்தி கலைஞர் பேசின கிளிப்பிங்ஸை போடுங்கப்பான்னு அட்வைஸ¥ம் கொடுத்தார். அப்ப இன்னும் ஒரு மாசத்துக்கு ரஜினி நடிச்ச படம் போடமாட்டீங்களான்னு கேட்க நினைச்சோம்! கூடவே வந்த நண்பர்தான் சன் டிவி வேற; சன் டிவியில் வரும் நியூஸ் வேறன்னு சொல்லி வயித்துல பெப்சி வார்த்தார்!

அங்கேயிருந்து நேரா கமலாலயம், காவி கோஷ்டிகள் மத்தியில் சந்தோஷம் இருந்தாலும் அதிகமாக வெளிக்காட்டிக் கொள்ளவில்லை. உள்ளே நுழைந்ததும் அம்மா ஆட்களான்னு சந்தேகமா கேட்டாங்க. இல்லேன்னு சொன்னதும்தான் நிம்மதியா முகத்திலே சிரிப்பே வந்துச்சு. நமக்கும் பழைய ஞாபகம் வந்துடுச்சு. 98ம் வருஷம் கோவைக்கு பிரச்சாரம் பண்ண வந்த அத்வானி ரஜினி பேச்சு எடுபடாதுன்னு சொன்னாரே இப்ப என்ன சொல்வாருன்னு அப்பாவியா கேட்டோம். அது அத்வானியின் கருத்து; வாஜ்பாயியின் கருத்து அல்ல என்று ஒரு அதிரடி பதில். அட நம்மூர் பாலிடிக்ஸில் காவி கோஷ்டிகளும் தேறிட்டாங்கப்பா!

வண்டியை நேரா புரசைவாக்கம் பக்கமிருக்கும் ப.சிதம்பரம் கட்சி பக்கம் விட்டோம். ஆபிஸில் யாருமில்லை. ஹி...ஹி எல்லோரும் பிரச்சாரத்துக்கு சிவகங்கை போயிருக்காங்களாம்! ஒரு எம்.பி சீட்டில் நின்னதற்காக ஒரு கூட்டணியையே நியாயப்படுத்தி பேச வேண்டிய நிலையிலிருக்கும் ப.சியின் மீது மனசில் அனுதாப அலை வந்து அடித்தது. ஸார், ஜெயிச்சு டில்லிக்கு போய்ட்டா ரெண்டு வருஷத்துக்குள் வரப்போகும் சட்டசபை எலெக்ஷனுக்கு யார் வேலை பார்க்கிறது?!


அங்கேயிருந்து நேரா தாயகம். ரஜினிதான் எங்களை நண்பர்கள்னு சொல்லிட்டாரே! அப்படின்னா என்ன அர்த்தம்? எங்களுடைய எதிரிகள் அவருக்கும் எதிரிகள்தானே... இதே டைப்பில் ஏகப்பட்ட வியாக்கியானங்கள். 'அண்ணே எதுக்குண்ணே இதெல்லாம்? நாப்பது தொகுதியை பார்க்காம உங்க நாலு தொகுதியை மட்டும் பார்த்து கரையேற வழியை பார்க்கலாமே'ன்னு நாம தைரியமா சொன்னதும் உள்ளேயிருந்து வந்த 'எவன்டா அவன்' குரலுக்கு ரீயாக்ஷன் காட்டி எஸ்கேப்பானோம்!

எக்மோர் பிரிட்ஜை தாண்டி நுங்கம்பாக்கம் வந்து விஜய் டிவி ஆபிஸ¤க்குள் நுழைஞ்சா கோபிநாத் கவலையா உட்கார்ந்திருந்தார். என்ன ஸார்.. நேரடி ஒளிபரப்பு காட்டி அசத்தினீங்க? இப்போ அசந்து போய் உட்கார்ந்திருக்கீங்களேன்னு கேட்டோம். ரசிக கண்மணிகள், 'யோவ்.......எங்களை வுட்டுட்டியே'ன்னு கேட்டதில் மிரண்டு போய்ட்டாராம். சரி வுடுங்க... ரஜினி அறிக்கை பத்தி ஷோக்கா கலக்கும் ஷாலினி என்ன சொன்னாங்கன்னு ஒரு வழிசலான கேள்வியை எடுத்துவுட்டதும் துரத்தி வுட்டுட்டார்!

ஷாலினி பத்தின நினைப்பால் ஜிவ்வானதும்தான் அந்த மடத்தனமான காரியத்தை செஞ்சேன். நண்பரை போத்தீஸ் பக்கம் டிராப் பண்ணிவிட்டு டி.நகரிலிருக்கும் பாமக தேர்தல் ஆபிஸில் ஆஜரானேன். ரஜினி அறிக்கை பத்தி கேட்டதும், ஏன் தம்பி வெட்டியா பேசணும்னு வெட்டி விடறதிலேயே குறியாய் இருந்தார் ஒரு கரை வேட்டி. 'பேசியாச்சு'ன்னு சின்ன அய்யா சொல்லியும் பத்திரிக்கைகாரனுங்க சும்மா இருக்காம பத்த வெச்சுட்டானுங்களேன்னு ஒரு சேம் சைடு கோல் போட்டதும் பார்ட்டி அம்பேல். எலெக்ஷன் முடியட்டும்....இலை வெட்டி, வேர் வெட்டி, விறகு வெட்டின்னு வெட்டியா சுத்திட்டிருக்கவனுங்களை கூப்பிட்டு வந்து ஒரு கை பார்க்குறோம்னு கர்ஜித்தது அந்த கிருதா மீசை! அந்த நேரம் பார்த்தா என் ·பிரெண்டு (நிஜமான எதிரி!) 'செல்'லடிக்குணும்?! ரிங் டோனில் வந்த ரஜினி பாட்டை கேட்டு டென்ஷனாகி, என் செல் போனை உடைச்சு, தடுத்த என்னோட காலையும் உடைச்சு... அது ஒரு சோக கதை வாத்யாரே!

- ராயப்பேட்டை ஆஸ்பிடலிலிருந்து ஜெ. ரஜினி ராம்கி

யாருக்கும் வெட்கமில்லை!

மதுரை அட்டாக்கில் சம்பந்தப்பட்ட ராமதாஸையும் மற்ற பாமகவினரையும் அரெஸ்ட் பண்ணி, வன்னியர்கள் ஜாஸ்தியாக இருக்கும் பகுதிகளில் மண்ணை கவ்வி ஜகா வாங்க அம்மாவுக்கு தில் கிடையாது!

(ராமதாஸ¥க்கு எதிரான?!) மதுரை தாக்குதலை கண்டித்து பாமகவை தனிமைப்படுத்தி ஓட்டுக்களை இழக்க பெரிய அய்யாவும் தயாரில்லை!

பாமகவை எதிர்ப்பதையே முழுநேர வேலையாக வைத்திருக்கும் சிறுத்தை பொடியனுக்கு எலெக்ஷன் நேரத்தில் ஏகப்பட்ட பணக் கஷ்டம், மனக் கஷ்டம்!

ஏகப்பட்ட செலவு செஞ்சு வாங்கியிருக்கும் சீட்டை யார் தயவிலாவது ஜெயிச்சாகணுமேன்னு கதர் வேஷ்டிகளுக்கு கவலை!

ஜெயிச்சு வந்தப்புறம் மெஜாரிட்டி கிடைக்காம திணறும்போது கூப்பிட்டா ஓடி வர பாமகவை விட தோதான ஆள் வேற கிடையாதுங்கிற நினைப்பு காவி கோஷ்டிக்கு!

இனிமே தமிழ்நாட்டுல தலைகீழா நின்னாலும் மூன்றாவது அணிக்கு சான்ஸ் இல்லேன்னு முடிவு கட்டி நாட்டோட வரவு செலவு கணக்கு பார்க்க அப்ளிகேஷன் போடலாம்னு 'டெல்லி சலோ' சொல்லும் சிவகங்கை சின்ன தம்பி ஒரு பக்கம்!

பூம்புகார் கூட்டத்தில் அய்யா பரேடு நடத்தினது மனசில் அடிக்கடி ஞாபகத்துக்கு வந்து தொலைந்தாலும் எதுக்கு வீண் பிரச்சினைன்னு ஜுட் பத்திரிக்கையுலகத்து பிதாமகன்கள்!

இனிமே மஞ்சள் கோஷ்டியை பார்த்தா நம்ம மக்களெல்லாம் பஞ்சா பறந்துடுவாங்க...! டியர் பிரதர்ஸ், என் பெயரை போட்டு கொடுத்துடாதீங்கோ! ஏற்கனவே வெட்டியா அலையும் என்னை வெட்டிடுவானுங்கோ!

இப்போதைக்கு ஜூட்!

- ஜெ. ரஜினி ராம்கி

ஏமாத்திப்புட்டீகளே அய்யா... கலைஞர் அய்யா!

மதுரையில் டாக்டர் ராமதாஸ¥க்கு எதிராக நடைபெற்ற வன்முறையை (?) கண்டித்து தேர்தல் ஆணையத்திடம் புகார் செய்ய போகிறதாம் திமுக தலைமையிலான ஜனநாயக முன்னேற்ற கூட்டணிக்கட்சிகள். கருப்புக்கொடி காட்டியவர்கள் ரஜினி ரசிகர்களே இல்லையாம்! ஆளுங்கட்சி அரேன்ஜ் பண்ணியவர்களாம். டாக்டரின் கண்டுபிடிப்பு இது! ரஜினி ரசிகர்களை விட கணிசமான ஜாதி ஓட்டுகளை கைவசம் வைத்திருக்கும் பாமகதான் முக்கியம் என்று முடிவெடுத்துவிட்டார் தென்னிந்தியாவின் மூத்த அரசியல்வாதியும் அரசியலில் பழம் தின்னு கொட்டை போட்டவருமான கருணாநிதி.... ஸாரி கலைஞர்!

பாபா படம் வெளியான போது நடந்த பிரச்சினைகளின் போது திமுகவுடன் பாமக நெருக்கம் காட்டாத பட்சத்திலும் கலைஞரால் வாய் திறக்க முடியவில்லை. பாஜகவை வெறுப்பேத்த பாபாஜியின் ஆயிரம் வருஷத்து பிறப்பை கிண்டலடித்தார்... அவலை நினைத்து உரலை இடிக்கிற மாதிரி! குறைந்த பட்சம் இரு தரப்புக்கும் மீடியேட்டராக செயல்படக்கூட கலைஞருக்கு நேரமுமில்லை மனசுமில்லை!

கூட்டணியில் பாமக இணைந்ததும் விழுப்புரத்தில் ரஜினி பற்றி ராமதாஸ் உதிர்த்த முத்துக்களை கண்டிக்க மனசில்லை. கூட்டணியை விட்டு கோவிச்சுக்கிட்டு போய்ட்டா என்னாவறது என்கிற நியாயமான கவலை அவருக்கு.

பாண்டிச்சேரி கூட்டத்தில் ரஜினி ரசிகர்கள் வெளிப்படையான எதிர்ப்பு நிலை எடுத்த பிறகாவது இரு தரப்பையும் தொடர்பு கொண்டிருக்கலாம் கலைஞர். அதனால் தனக்கு பாதிப்பு வராது என்று நினைத்தாரோ என்னவோ?!

குறைந்த பட்சம் மதுரையில் ரசிகர்கள் தாக்கப்பட்டபோதாவது ப.சிதம்பரம் மாதிரி வழ வழ கொழ கொழ பாணியில் ஒரு அறிக்கை கொடுத்து (அது கலைஞருக்கு அல்வா சாப்பிடற மாதிரி!) வெள்ளைக்கொடி அசைத்து விஷயத்தை சிக்கலாக்காமல் இருந்திருக்கலாம். கூட்டணிக் கட்சிகளை மெனக்கெட்டு கூட்டி தேர்தல் ஆணையத்திடம் புகார் கொடுக்க தீர்மானம் போட்டு ரஜினி ரசிகர்களின் உணர்வுகளை அசிங்கப்படுத்தி ஜாதி அரசியலுக்கு ஒட்டு போட்டிருக்கிறார் கலைஞர். ஜாதீயத்தோடு கூட்டணி போட்டு 2001ல் கலைஞர் பட்ட பாட்டை மக்கள் மறந்திருக்கமாட்டார்கள்.

எது எப்படியோ,

நீலச் சாயம் வெளுத்துப் போச்சு...டும், டும், டும்!
ராசா வேஷம் கலைஞ்சுப் போச்சு...டும், டும், டும்!
நரி காட்டை விட்டே ஓடிப் போச்சு...டும், டும், டும்!

மக்கள் சொல்வார்கள்...நிச்சயமாக!

- ஜெ. ரஜினி ராம்கி

சிங்கம் ஒன்று புறப்பட்டதே...

பா.ம.க.,வுக்கு எதிராக ரஜினி பொங்கி எழுந்து விட்டார். லோக்சபா தேர்தலில் அக்கட்சி போட்டியிடும் ஆறு தொகுதிகளிலும் தோற்கடிக்க, தன்னுடைய ரசிகர்களுக்கு பகிரங்க கட்டளை பிறப்பித்து விட்டார். இத்தொகுதிகளில், அ.தி.மு.க., மற்றும் பா.ஜ.,வுக்கு அவர் ஆதரவு தெரிவித்துள்ளார். பா.ம.க.,வின் மீது கடும் ஆத்திரத்தில் உள்ள ரசிகர்கள், ரஜினியின் இந்த முடிவால் உற்சாகம் அடைந்துள்ளனர். பா.ம.க.,வை தோற்கடிக்க முழு வீச்சில் செயல்பட ஆரம்பித்து விட்டனர்.

அரசியலில் ரஜினி இதுவரை நேரடியாக இறங்கவில்லை என்றாலும், தனது "வாய்ஸ்' மூலம் அரசியல் செய்து வருகிறார். கடந்த 1996ம் ஆண்டு நடந்த சட்டசபை தேர்தல் முதல், அவருடைய "அரசியல் வாய்ஸ்' ஒலித்துக் கொண்டிருக்கிறது. அத்தேர்தலில், ஜெயலலிதா ஆட்சிக்கு வரக் கூடாது என்று "வாய்ஸ்' கொடுத்தார். "ஜெ., மீண்டும் ஆட்சிக்கு வந்தால் தமிழகத்தை ஆண்டவனாலும் காப்பாற்ற முடியாது' என்றார். தி.மு.க., த.மா.கா., கூட்டணியை வெற்றி பெறச் செய்யும்மாறு "டிவி' மூலமும், அறிக்கை மூலமும் வேண்டுகோள் விடுத்தார். அந்த தேர்தலில் அ.தி.மு.க., படுதோல்வி அடைந்தது.

அதன் பின், 1998ம் ஆண்டு கோவையில் தொடர் குண்டுவெடிப்புகள் நடந்த போது தி.மு.க.,வுக்கு ஆதரவாக அவர் கொடுத்த "வாய்ஸ்' எடுபடவில்லை. அதற்கு பிறகு, 1999ம் ஆண்டு நடந்த லோக்சபா தேர்தலிலும், 2001ல் நடந்த சட்டசபை தேர்தலிலும் அடக்கி வாசித்து விட்டார். யாருக்கும் ஆதரவு தெரிவிக்கவில்லை.

இந்த லோக்சபா தேர்தலில் அவருடைய "வாய்ஸ்' ஒலித்துள்ளது. "பாபா' பட ரிலிசின் போது பா.ம.க., ராமதாஸ், ரஜினியை தனிப்பட்ட முறையில் கடுமையாக விமர்சித்தார். அப்படம் வெளியான தியேட்டர்களில் பா.ம.க.,வினர் நுழைந்து திரைகளை கிழித்தனர். படச்சுருள் பெட்டிகளை கடத்திச் சென்றனர். பேனர்களை வெட்டி வீழ்த்தினர். அச்சமயம், பா.ம.க.,வுக்கும் ரஜினி ரசிகர்களுக்கும் பல இடங்களில் மோதல் ஏற்பட்டது.

சமீபத்தில், திருவண்ணாமலை மாவட்டத்தில் பேசிய ராமதாஸ், ரஜினியை மிகவும் கீழ்தரமாக விமர்சித்தார். இதனால், ராமதாசுக்கும், ரஜினிக்கும் மீண்டும் மோதல் வலுத்தது. இந்த மோதலால், பா.ம.க., தொண்டர்களால் ரஜினி ரசிகர்கள் பல இடங்களில் தாக்கப்பட்டனர். அப்போதே, லோக்சபா தேர்தலில் பா.ம.க.,வுக்கு எதிராக செயல்பட ரஜினி ரசிகர்கள் முடிவெடுத்து, செயல்பட ஆரம்பித்து விட்டனர். தங்களுக்கு அனுமதி வழங்கும்படி ரஜினியையும் வலியுறுத்தி வந்தனர்.

ரசிகர்களின் கோரிக்கைக்கு தனது ரசிகர் மன்றத் தலைவர் சத்யநாராயணா மூலம், நேற்று பச்சைக்கொடி காட்டினார் ரஜினி. லோக்சபா தேர்தலில் பா.ம.க.,வை தோற்கடிக்க அனுமதி வழங்கியதுடன், இக்கட்சிக்கு எதிராக போட்டியிடும் அ.தி.மு.க., மற்றும் பா.ஜ.,வின் வெற்றிக்கு பாடுபடும்படியும், அக்கட்சிகளுக்கு ஓட்டு போடும்படியும் ரசிகர்களுக்கு உத்தரவிட்டுள்ளார். புதுச்சேரியில் நேற்று நடந்த ரஜினி ரசிகர்கள் மன்றக் கூட்டத்தில் , ரஜினி ரசிகர் மன்றத் தலைவர் சத்யநாராயணா இந்த அறிவிப்பை வெளியிட்டார்.

ரஜினியின் முழு ஒப்புதலோடு வெளியாகியுள்ள இந்த அறிவிப்பால், அவருடைய ரசிகர்களிடையே உற்சாகம் கரைபுரண்டோடுகிறது. பா.ம.க.,வுக்கு எதிராக வரிந்து கட்டிக் கொண்டு வேலையை பார்க்க ஆரம்பித்து விட்டனர்.

தி.மு.க., தலைமையிலான ஜனநாயக முற்போக்கு கூட்டணியில் பா.ம.க., இடம் பெற்றுள்ளது. இக்கூட்டணியில், செங்கல்பட்டு, அரக்கோணம், திண்டிவனம், சிதம்பரம், தர்மபுரி, புதுச்சேரி ஆகிய ஆறு லோக்சபா தொகுதிகளில் பா.ம.க., போட்டியிடுகிறது. அக்கட்சிக்கு எதிராக இத்தொகுதிகளில், அ.தி.மு.க., பா.ஜ., கூட்டணி போட்டியிடுகிறது. செங்கல்பட்டு, அரக்கோணம், திண்டிவனம் தொகுதிகளில் அ.தி.மு.க.,வும் சிதம்பரம், தர்மபுரி, புதுச்சேரி தொகுதிகளில் பா.ஜ.,வும் பா.ம.க.,வை எதிர்த்து போட்டியிடுகின்றன.

இந்த ஆறு தொகுதிகளிலும் அ.தி.மு.க., மற்றும் பா.ஜ.,வுக்கு ஆதரவாக ரஜினி ரசிகர்கள் பிரசாரம் செய்ய உள்ளனர். அதோடு, பிரசாரத்தில் சத்யநாராயணாவும் பங்கேற்கிறார். இந்த ஆறு தொகுதிகளைத் தவிர, தமிழகத்தில் உள்ள மற்ற தொகுதிகளில் யாருக்கு ஆதரவு என்பதை ரஜினி இன்னும் முடிவு செய்யவில்லை. இதனால், ரசிகர்களிடையே குழப்பம் நிலவுகிறது. "ரஜினி தற்போது வெளியூர் சென்றுள்ளார். அவர் திரும்பியதும், இது குறித்த முடிவை அவர் எடுப்பார்' என்று சத்யநாராயணா தெரிவித்தார்.

இது தொடர்பாக அவர் புதுச்சேரியில் நேற்று அளித்த பேட்டி:

*""பா.ம.க., போட்டியிடும் 6 தொகுதிகளிலும் ரஜினிகாந்த் பிரசாரத்தில்

ஈடுபடுவாரா?''

மாட்டார். தேவைப்பட்டால் நான் பிரசாரம் செய்வேன்.

*""பிரசாரத்தில் ஈடுபடாவிட்டாலும் ரஜினி "வாய்ஸ்' கொடுப்பாரா?''

இதை அவரிடம் தான் கேட்க வேண்டும்.

*""பா.ம.க.,வை 6 தொகுதிகளிலும் தோற்கடிப்போம் என்கிறீர்கள். அதற்கான காரணம் என்ன?''

"பாபா' படம் வெளி வந்தபோது ரஜினி ரசிகர்களுக்கு ஏற்பட்ட பாதிப்பு, மன உளைச்சல், இதை எல்லாம் தாண்டி ரஜினிகாந்த்தை நேரிடையாக கொச்சைப்படுத்தி விமர்சனம் செய்தது தான் காரணம். அதனால், ஜனநாயக முறையில் பா.ம.க.,விற்கு எதிராக அ.தி.மு.க., பா.ஜ., கூட்டணிக்கு ரஜினி ரசிகர்கள் ஓட்டு கேட்பார்கள்.

*""ஜெ., ஆட்சிக்கு வந்தால் தமிழகத்தை ஆண்டவனாலும் காப்பாற்ற முடியாது என்று சொன்ன ரஜினிகாந்த், தற்போது அ.தி.மு.க., விற்கு ஆதரவு தருவது முரண்பாடாக இல்லையா?''

அப்போதைய நிலை வேறு. இப்போதுள்ள நிலை வேறு. இப்போது பா.ம.க.,வினரால் ரசிகர்களின் மனம் புண்பட்டுள்ளது. ரசிகர்களின் உணர்வுகளை புரிந்து கொண்டு தான் பா.ம.க.,வை தோற்கடிக்க வேண்டும் என்ற முடிவை எடுத்துள்ளோம்.

*""பா.ம.க., வினரை விட , ரஜினியை அ.தி.மு.க.,வினர் அதிகம் திட்டியுள்ளார்களே?''

பா.ம.க.,வை போல் அ.தி.மு.க., தரக்குறைவாக நடந்து கொள்ளவில்லை. ரஜினிகாந்த்தை அ.தி.மு.க.,வினர் நேரடியாக எப்போதும் விமர்சனம் செய்தது கிடையாது.

*""பா.ம.க., போட்டியிடும் 6 தொகுதிகளில் தான் பா.ஜ., அ.தி.மு.க., கூட்டணிக்கு ஆதரவாக செயல்படுவோம் என்று கூறியுள்ளீர்கள். தமிழகத்தில் உள்ள மற்ற தொகுதிகளில் உங்களுடைய நிலை என்ன?''

தமிழகத்தில் உள்ள மற்ற தொகுதிகளின் நிலை குறித்து ரசிகர்கள் மத்தியில் குழப்பம் இருக்கிறது. ரஜினிகாந்த் தற்போது வெளியூர் சென்றிருப்பதால் அவர் வந்த பிறகு உரிய நேரத்தில் முடிவு அறிவிக்கப்படும்.

*""தி.மு.க., தலைவர் கருணாநிதி, ரஜினிகாந்துடன் பேசினால் பா.ம.க.,வை எதிர்க்கும் முடிவை மாற்றிக் கொள்வீர்களா?''

அதை ரஜினி தான் முடிவு செய்வார்.

*""பா.ம.க., உயர்மட்ட தலைவர்கள் ரஜினிகாந்திடம் பேசிவிட்டதாக அன்புமணி சொல்லியிருக்கிறாரே?''

அது போல் யாரும் ரஜினியை சந்தித்து பேசவில்லை.

*""ரஜினி காந்த் அரசியலில் வருவதற்கான எதிர்கால திட்டமாகத் தான் தற்போது 6 தொகுதிகளில் பா.ம.க.,வை நேரிடையாக எதிர்க்கிறீர்களா?''

அதற்கும், இதற்கும் சம்பந்தமே இல்லை.

*""பா.ஜ., வினர் உங்களை சந்தித்து ஆதரவு கேட்டார்களா?''

கேட்டார்கள்.

*""இந்த தேர்தலில் ரஜினி ரசிகர்களின் பங்கு எவ்வாறு இருக்கும்?''

பா.ஜ., அ.தி.மு.க., வேட்பாளர்கள் இந்த 6 தொகுதிகளிலும் வெற்றி பெறுவதற்கு கடுமையாக உழைப்பார்கள். மக்கள் முகம் சுளிக்காத வகையில் ஜனநாயக முறையில் தேர்தல் பணியில் ஈடுபடுவார்கள்.

நன்றி - தினமலர்

டாக்டர் ராமதாசுக்குப் பத்து கேள்விகள்!

அன்பிற்கும் மரியாதைக்குமுரிய திரு.ராமதாசுக்கு வணக்கங்கள் பல! உங்களது ஆவேசமான பேட்டியையும், ரஜினிக்கான பத்து கேள்விகளையும் படித்தவுடன் இந்தக் கடிதம் எழுதுகிறேன். இந்தக் கடிதத்தை எழுதுவதால், நான் ரஜினி ரசிகன் என்று தவறாய் எடுத்துக் கொள்ள வேண்டாம். ஒரு சராசரி குடிமகன், கொஞ்சம் சமூகத்தின் மீது அக்கறை உள்ள பார்வையாளன் என்று வைத்துக் கொள்ளுங்கள். உங்களின் 'கனிவான' பார்வைக்கு, நான் ஒரு பத்து கேள்விகளை வைக்கிறேன்.

(1) தற்போது நடிகர்களையும், திரையுலகையும் கண்ட மேனிக்கு விமர்சிக்கும் தாங்கள்..சில வருடங்களுக்கு முன்பு மன்சூர் அலிகான் என்ற 'ஒழுக்கமான' நடிகரை உங்கள் கட்சியில் சேர்த்துக் கொண்டது ஞாபகம் இருக்கிறதா? அப்போது திரையுலகம் நல்ல முறையில் செயல்பட்டுக் கொண்டிருந்ததா அல்லது திரு.மன்சூர் அலிகான் சிறந்த மனிதர் என்ற முறையில் சேர்த்துக் கொள்ளப்பட்டாரா?

(2) திருவாளர். வீரப்பன் தமிழர் என்பதால், அவரை கன்னடரான
திரு.ரஜினிகாந்த் விமர்சிக்கக்கூடாது என்று சொல்லி இருக்கிறீர்கள்?
அப்படியென்றால்...'தாவூத் இப்ராகிம்' என்ற இந்தி பேசும் கொள்ளைக்காரன்,
லல்லு பிரசாத் யாதவ் என்ற பீகாரி ஆகியவர்களை விமர்சிக்கும் தகுதி
'மரத்தமிழனுக்கு' கிடையாதா?

(3) 'நான் நினைத்தால் தமிழகத்தில் ஒரு பத்திரிக்கை கூட வரமுடியாது!
காடுவெட்டி குருவுக்கு ஒரு 'சிக்னல்' கொடுத்தால் போதும்' என்றெல்லாம் பேசுவது,
ஒரு பொறுப்பான தலைவருக்கு அழகாகுமா? காடுவெட்டி குரு என்ற கட்சிக்காரரை,
நீங்களே வன்முறைக்கு தகுந்தவர் என்று அடையாளம் காட்டி அழகுபடுத்துவது
பொறுப்பான தலைமையாகுமா?

(4) பாட்டாளி மக்கள் கட்சிக்கும், உங்களுக்கும் 'பதவிகளில்' ஆசை இல்லாதது
போலவும், கொள்கை தான் முக்கியம் என்பது போலவும் சில சமயங்களில்
பேசுகிறீர்கள். ஆனால், 'ஜெயலலிதாவோடு உறவு வைத்துக் கொள்வது....'
என்று ஆரம்பித்து, பச்சை பச்சையாய் நீங்கள் பேசிய அசிங்கங்களை மறந்து,
'சகோதரி பார்த்துக் கொள்வார்' என்று ஒரு 'அந்தர் பல்டி' அடித்தீர்கள்.
'கருணாநிதியோடு இருந்தால் கோவணத்தையும் உருவி விடுவார்' என்று சொல்லி
விட்டு, இப்போது அவரோடு கை கோர்த்து இருக்கிறீர்கள். (ஜெவுக்கும்,
கலைஞருக்கும் 'வெட்கம்' இல்லை என்பது வேறு விஷயம்). உங்கள் கட்சியின்
கொள்கையில், 'வெற்றிக்காக தாவலாம்.. தவறில்லை!' என்று
பொறிக்கப்பட்டிருக்கிறதா?

(5) 'ஜாதி மத பேதங்கள் கூடாது!' என்று மிக சமீபத்தில் பேசி
இருக்கிறீர்கள். ஆனால், தங்களது பாட்டாளி மக்கள் கட்சியே..'வன்னியர்'
சங்கத்திலிருந்து உதித்தது என்பதும், 'வன்னியர் ஓட்டு அன்னியருக்கில்லை!'
என்பதை தேர்தல் சமயங்களில் கோஷங்களாக சொல்லப்பட்டதும், தாங்கள்
சாதிகளைக் கடந்து வந்து நிற்கும் ஒப்பற்ற தலைவராக காண்பிக்கவில்லையே?

(6) 'ஊழல் புரிந்தார்கள் என்று தெரிந்தால் சவுக்கால் அடிப்பேன்!' என்று
மேடைகளில், சவுக்கை கட்டி தொங்க விட்டு பிரச்சாரம் செய்தீர்கள்.. தவறு
செய்தவர்களை 'சவுக்கால்' அடிப்பது கட்சிக்குள் ஜனநாயகம் வளர்க்க நினைக்கும்
செயலா அல்லது தாங்கள் சர்வாதிகாரத்தின் மேல் நம்பிக்கை உள்ளவர் என்பதன்
பறைசாற்றுதலா? இப்போது கூட, பெட்ரோல் பங்க் ஊழல் என்று சகல
பத்திரிக்கைகளிலும் பாமகவின் பெயர் கொட்டை எழுத்துகளில் இடம் பெற்றும்...
அது சம்பந்தமாக எந்த ஒரு அறிக்கையும் ஆதாரத்தோடு உங்கள் தரப்பிலிருந்து
தரப்படவில்லையே? இல்லை... 'ஊழல் உண்மைதான்' என்று உணர்ந்து, உங்கள்
மந்திரிகளை சவுக்கால் அடித்து விட்டீர்களா?

(7) 'ஒரு காலத்தில் மரம் வெட்டினோம். ஆனால் அதற்கப்புறம் 'பசுமைத்
தாயகத்தின்' மூலம் எத்தனை கன்றுகளை நட்டிருக்கிறோம். அதை ஏன்
பத்திரிக்கைகளில் எழுதுவதில்லை?' என்று கேட்கிறீர்கள்? அப்படிப்பார்த்தால்...
ரஜினி புகை பிடிக்கிறார், குடிக்கிறார்...ஆனால், அவர் எவ்வளவோ நல்ல
விஷயங்களை படங்களில் போதிக்கிறார், அதை ஏன் நீங்கள் பார்ப்பதில்லை?
'வீட்டைக் கவனி' என்று யார் வேண்டுமானாலும் சொல்லலாம், அதற்கு சூப்பர்ஸ்டார் தேவையில்லை!' என்று சொல்லி இருக்கிறீர்கள்...யார் வேண்டுமானாலும் சொல்லலாம், ஆனால் சூப்பர்ஸ்டார் சொன்னால் கேட்பதற்கு ஒரு பெரிய கூட்டமே இருக்கிறதே?

(8) 'பாபா பிரச்சினைக்கு முற்றுப்புள்ளி வைத்து விட்டேன். நமக்கு நிறைய
வேலை இருக்கிறது!' என்று சொல்லி இருக்கிறீர்கள். ரஜினியால் சமூகமே
சீரழிந்து கொண்டிருக்கிறது என்று 'லபோ திபோ' வென அடித்துக் கொண்டு விட்டு,
வீர வசனங்கள் பேசி விட்டு... 'இன்றோடு அந்தப் பிரச்சினை முடிந்து விட்டது,
விட்டுவிடுங்கள்!' என்று சொன்னால்..சமூகம் திருந்தி விட்டதா? அல்லது,
ரஜினிகாந்த் இனி புகைப்பதில்லை என்று உங்களிடம் வாக்கு கொடுத்திருக்கிறாரா?
இல்லை.. உங்களுக்கு கிடைக்க வேண்டிய விளம்பரம் கிடைத்துவிட்டது என்ற
திருப்தியின் வெளிப்பாடா?

(9) ' நான் ஏன் தமிழகத்தை பிரிக்க வேண்டும் என்று புரிந்து கொள்ளாமல்,
பிரிவினைவாதம் பேசுகிறேன் என்று சொல்வது மடத்தனம். என்னோடு மேடையில்
யாராவது விவாதிக்க தயாரா?'என்று கேட்கிறீர்கள். நீங்கள் ஏன் அது குறித்த
விவாதங்களை பத்திரிக்கைகளில் பத்து கேள்விகளாக வைக்க கூடாது? மூன்று
நாளில் முற்றுப்புள்ளி பெறும் சமாச்சாரங்களை எல்லாம் பத்து கேள்விகளாய்
வைக்கும் நீங்கள், ஏன் ஒரு நல்ல விவாதத்துக்கு உங்கள் நேரத்தை
செலவிடக்கூடாது? (எங்கள் நேரத்தையும்..)


(10) கடைசியாக, 'ரஜினிகாந்தே நான் அறிக்கை விட்ட மறுநிமிடம்
சமாதானக் கொடி காண்பித்துவிட்டார்...நீ யாரடா பொடியன்?' என்று யாருக்கும்
'சிக்னல்' கொடுத்து விட மாட்டீர்களே? ரஜினிகாந்துக்கும் ராமதாசுக்கும் அடுத்த
வேலைகள் நிறைய இருக்கிறது..ஆனால், அவர்களைப் பின்பற்றும் ரசிகர்களும்,
தொண்டர்களும் ஜென்மத்துக்கும் அடித்துக்கொள்ளப் போகிறார்களே, அந்தக்
கவலையில் தான் கேள்விகள் கேட்டேன். சத்தியமாய்..எனக்கும் நிறைய
வேலை இருக்கிறது!


டாக்டர். ராமதாஸ் திரு.ரஜினிகாந்திற்குப் பத்துக் கேள்விகள் ஆனந்த விகடன் மூலம் கேட்டிருந்த போது, எழுதிய கட்டுரை இது. பாபா படப்பெட்டிகள் சூறையாடப்பட்டு, களேபரங்கள் நடந்து கொண்டிருந்த காலம். இப்போது 'ரஜினி ஒரு நல்ல நடிகர்,அவருக்கும் எங்களுக்கும் பிரச்சினை இல்லை' என்று டாக்டர் அந்தர் பல்டி அடித்துக் கொண்டிருக்கிறார். ரஜினியும் எப்போதும் போல மிஸ்டர்.கழுகாரின் உளவிலும், சுவாமி.வம்பானந்தாவின் கனவிலும்
காய்களை நகர்த்தியபடியே இருக்கிறார். ரசிகர்களும், தொண்டர்களும் அவ்வப்போது கோதாவில் இறங்க, அப்பாவி பொதுஜனம் அத்தனையும் பார்த்தபடி இருக்கிறது

நன்றி - அருண் வைத்யநாதன்